شعب في الخلاط

طبعا كلنا عارفين الخلاط

الداخل فيه مضروب والخارج منه مشروب

اهو احنا شعب في الخلاط الناس ماشية مدروخة ومحدش طايق نفسه

كله بيجري على أكل عيشه وعيشه بيجري قدام كله

الأسعار جنان والمدارس داخلة مع رمضان الطف بعبادك يا حناان يا مناان

مع ارتفاع الأسعار الحكومة ترفع شعار رمضان بلا طعااام

معاهم حق هو رمضان شهر عباده ولا أكل؟

بس احب أطمن الناس إن في سلعة مهمه رخصت مغليتش

افرحوا يا غلابة الحشيش رخص اه والله رخص

يلا خلي الشعب يعيش

صدق إللى قال خبطتين في الرأس توجع بس المرة دي تموت مش توجع بس

رمضان مع المدارس هنلاحق على اية ولا اية الناس مطحووونة

بس انتوا عارفين هنظلم الحكومة لية مفيش في إيدهم حاجة لأن مينفعش نقدم او نأخر رمضان

على رأي راجل عجوز قابلتة عند فرن العيش

فين أيامك يا سيدنا يوسف (معلومة الراجل مش عايش من أيامها) كانت العالم تيجي تاخد أكلها من عندنا مش الوقتي مش عارفين نجيب رغيفين عيش ربنا ياخدك يا ...... تييييييييييييييت .....(علشان الرقابة) والعجيب يا أخي ان كل حاجة بتغلى في البلد دي إلا الانسان يمكن علشان متوفر عندنا ...........يمكن

بس برضوا احنا الي غلطانين ما الراجل قاعد ينبح في صوته تحديد النسل تنظيم الاسرة هأكلكم منين

عالم مبتفهمش ما احنا لو قلينا أكيد هنغلى

كله إلا الاشاعة اللى الحاقدين طلعوها دي إن الريس مات والنااس فرحـتتتتتتتتتتتتتتتتتتتتتتتت

كنا هنعمل إية من غيره انا من يوم ما وعيت على الدنيا والناس بتقول لبعض رمضان مبارك

الناس تقول اية الوقتي رمضان الراحل مبارك

يوووووووووووووه

اية الى جاب السيرة دي مبلاش نتكلم في السياسة انا اصلا مابحبش السياسة

اما اروح اشوف حاجة اكلها احسن بس اياك ألاقي

للمسؤلين في مصر كتر خيركم على الى بتعملوه فينا
للشعب المصري كتر خيركم انكم مستحملين الى بيتعمل فيكم